About Me

హెచ్‌ఐవి పాజిటివ్ బాలికలు,వారి లాయర్ పై దుర్మార్గంగా దాడి చేసిన పోలీసులు

ఛత్తీస్‌ఘడ్ పోలీసులు, మహిళా శిశు సంక్షేమ శాఖ అధికారులు హెచ్ఐవి సోకిన 14 మంది బాలికలు, న్యాయవాది ప్రియాంక శుక్లాలపై దారుణంగా దాడి చేసి రక్తాలు వచ్చేలా కొట్టి వారందరినీ గుర్తు తెలియని ప్రదేశానికి ఎత్తుకెళ్ళారు.

ఈ రోజు (ఆగస్టు 17) న్యాయవాది ప్రియాంక జీవన సహచరుడు అనుజ్ శ్రీవాస్తవ ప్రియాంక ఫేస్బుక్ నుంచి చేసిన ప్రత్యక్ష ప్రసారంలో ఈ విషయాలు వివరించారు. సర్కండా పోలీస్ స్టేషన్ ఇన్‌ఛార్జి (టి ఐ) శనిప్ రాత్రే, ఎస్‌పి నిమిషా ఆధ్వర్యంలో పోలీసులు, మహిళా- శిశు సంక్షేమ శాఖ అధికారులు, ఛత్తీస్‌ఘడ్‌లో వున్న ఏకైక హెచ్ఐవి సోకిన మైనర్ బాలికల ఆశ్రయం ʹఅప్నాఘర్ʹలో నివసిస్తున్న 14 మంది హెచ్ఐవి సోకిన మైనర్ బాలికలను, న్యాయవాది ప్రియాంక శుక్లాను తీవ్రంగా కొట్టి జుట్టు పట్టుకొని లాగుతూ అజ్ఞాత ప్రదేశానికి ఎత్తుకెళ్లి పోయారు అని చెప్పారు.
ఈ ఆశ్రయం చాలా సంవత్సరాల నుంచి నడుస్తోంది. అయితే క్రితం సంవత్సరం మాత్రమే ప్రభుత్వ సహాయం కోసం విజ్ఞప్తి చేశారు. మహిళా –శిశు సంక్షేమాధికారి పార్వతి శర్మ, ప్రభుత్వం మంజూరు చేసే నిధులలో 30 శాతం కమీషన్ యివ్వాలని అడిగింది. ʹఅప్నాఘర్ʹ నిర్వాహకులు అందుకు నిరాకరించడంతో వారిని వేధించడం మొదలుపెట్టింది. ఆశ్రయం నడిపే ప్రమాణాలు సరిగా లేవు కాబట్టి ఆశ్రయాన్ని మూసివేసి బాలికలందరినీ వేరే ప్రాంతాలకు తరలించాల్సి వుంటుంది అని చెప్పింది. ఇటీవల ఎన్‌డిటివిలో రవిష్ కుమార్ షెల్టర్ హోమ్ ʹఅప్నాఘర్ʹ గురించి కథనాలను ప్రసారం చేసినప్పుడు లాయర్ ప్రియాంక ఈ విషయాల్ని ఎన్‌డిటివిలో బహిర్గతం చేశారు.
ఛత్తీస్‌గఢ్ రాష్ట్రంలోని బిలాస్‌పూర్ జిల్లాలో, మహిళా- శిశు అభివృద్ధి శాఖ ఉన్నతాధికారులు అధికారులు సర్కండా పోలీస్ స్టేషన్ సిబ్బందితో ʹఅప్నా ఘర్ʹ షెల్టర్ హోమ్‌కు వచ్చి ముందస్తు హెచ్చరికలేమీ లేకుండా హెచ్‌ఐవి సోకిన మైనర్ బాలికలను తీవ్రంగా కొట్టారు. 14 మంది బాలికలను, ʹఅప్నాఘర్ʹ షెల్టర్ హోమ్‌ న్యాయ సలహాదారైన న్యాయవాది ప్రియాంక శుక్లా (ప్రియా శుక్లా) ను అజ్ఞాత ప్రదేశానికి ఎత్తుకెళ్లి పోయారు. తాను షెల్టర్ హోమ్‌కు వచ్చినప్పుడు, విరిగిన గాజుల ముక్కలు, రక్తం మరకలు కనపడినట్లు అనూజ్ ఆ వీడియోలో చెప్పారు. అనూజ్ జర్నలిస్టు. అదే హోదాలో ఆయన సర్కండా పోలీస్ స్టేషన్ ఇన్‌చార్జితో మాట్లాడటానికి ప్రయత్నించినప్పుడు, తనతో అమర్యాదకరమైన భాషను ఉపయోగించి, చట్ట ప్రక్రియలో జోక్యం చేసుకుంటున్నావనే ఆరోపణతో కేసు పెడతామని బెదిరించాడు స్టేషన్ ఇన్‌చార్జి. పైగా అనూజ్ ను వీడియో తీశారు. అతని దగ్గరినుండి మొబైల్ ఫోన్ గుంజుకున్నారు. బాలికలను, ప్రియాంకను ఎక్కడికి తీసుకెళ్లారనే దాని గురించి అనుజ్‌కి ఏమీ చెప్పలేదు.
HIV పాజిటివ్ వున్న పిల్లల్ని కొట్టడానికి వీరికి ఎవరు అధికారం ఇచ్చారు? లంచం అడిగిన సురేష్ సింగ్, పార్వతి శర్మల మీద విచారణ ఎందుకు జరపలేదు అని ప్రశ్నిస్తున్నారు అనుజ్.
ఛత్తీస్‌గఢ్ పోలీసుల గూండాయిజాన్ని ఖండించాలని, 14 మంది హెచ్‌ఐవి సోకిన మైనర్ బాలికలతో పాటు న్యాయవాది ప్రియాంక శుక్లాకు మద్దత్తుగా నిలబడాలని ప్రగతిశీల ప్రజాస్వామిక సహచరులందరికీ విజ్ఞప్తి చేసారు.
ప్రియా శుక్లా తన ఫేస్‌బుక్‌లో యిచ్చిన పరిచయాన్ని బట్టి ఛత్తిస్‌గఢ్ పియుసిఎల్‌లోనూ, జగదల్‌పూర్ లీగల్ ఎయిడ్‌లోనూ, ఆమ్ ఆద్మీ పార్టీలో వలంటీర్‌గానూ పని చేస్తున్నారని తెలుస్తోంది.

కాగా ఈ ఘటనపై టైమ్స్ ఆఫ్ ఇండియా ఓ కథనాన్ని ప్రచురించింది. ఆ పత్రిక కథనం ప్రకారం... పోలీసులు ఈ ఆశ్రమం మీద దాడి చేస్తున్నప్పుడు స్థానికులు రహస్యంగా వీడియోలు తీశారు. తమ దగ్గర ఆ వీడియోలు ఉన్నాయని టమ్స్ పేర్కొంది ఆ వీడియోల్లో పోలీసులు బాలికలను జుట్టు పట్టుకొని లాగడం, బలవంతంగా తీసుకువెళ్ళడం ,వాహనాల్లోకి తరలించడం వంటివి స్పష్టంగా చూపించాయి. చెవి-ఉంగరాలు, హెయిర్ బ్యాండ్లు, మాస్క్ లు ఇతర వస్తువులు నేలపై చెల్లాచెదురుగా కనిపించాయి. ʹఅప్నా ఘర్ʹ సూపరింటెండెంట్ దీపికా సింగ్ స్థానిక మీడియాతో మాట్లాడుతూ పోలీసులు, సిబ్బందిని, పిల్లలను బలవంతంగా లాక్కెళ్ళారు. పిల్లలను ఇక్కడి నుండి తీసుకెళ్ళేందుకు అధికారులు జారీ చేసిన ఉత్తర్వుల కాపీని ఇవ్వడానికి కూడా అధికారులు కూడా నిరాకరించారని చెప్పారు.
Source...avaninews.com

(2020-08-19 17:05:06)

Post a Comment

0 Comments